S'Lääbe vo dr Giftspritzi

Als Ainzelmasgge philosophiert dä verwirrti Chemiker iiber Theeme, wo d Lyt beweggt hänn und versuecht in siim Laboor, s aint oder ander Gift z‘mische – zem schlussändligg mit dr Noodle uff die z’zyyle, wo duur’s Joor Saich gmacht hänn.

Aaber ganz vo Afang aa….

Mer schryybe s Joor 19hundert-iirgendwenn, uff jeede Fall n. Chr. Es isch dr 11. Novämber und es het zu dääne Zytte gheert, wo dr Rhy als fascht yygfrooren isch vor lutter Kälti. Am Haafebeggi zwai im Glaibasel het's e Buebedrummle aahnegschwemmt. Dr Schorsch, e Haafenaarbeiter, hett denn die Drummle uss em Wasser ghoolt. Zer glyyche Zyt sinn zwai Nonne vom Kloschter Hääsige zuefälligerwyys aahnegloffe. Si sinn an däm Daag go spaziere und hänn denn dr Schorsch gfroggt, eb si iihm solle hälfe uffmache. Deert drinn isch denn e glai Buschi mit griene Hoor und eme (sehr!) schieffe Zingge glääge. Doo me nit uusgefunde het, wäär dr Babbe und d Mamme isch, hänn die zwai Nonne zämme beschlosse, das Kindli mitznäh und uffzzieh.

S' Haafebeggi 2 syynerzyt. Doo isch d'Giftspritzi entdeggt worde. In dääre Buebedrummle isch d'Giftspritzi gfunde worde. S'Fetteli vom eerschte Schueldaag - bitte lächle!

Dr Pfaarer vo Hääsige seelig het sich denn berait ergläärt, dä Fratz (N.d.R.b) z'säägne und z‘dauffe. Nooch und nooch isch dä Bueb denn erwaggse woorden und het d Kultuur vom Bebbi schätze und liebe gleernt: ob FC Basel, Herbschtmäss und vorallem d‘ Fasnacht – kai Wunder wenn me bedänggt, ass siini Erziehigspersoone wäährend de drey scheenschte Dääg in de Basler Baize sinn go Schnitzelpsälm verbraite. Är het e huffe vom Pfaarer und siine Mitläufer kenne lerne. Das het dä glai Bueb prägt – und isch em speeter au z’guet kho! In dr Schuelzyt hänn denn Psycholoogen uusegfunde, ass dä Bueb zwoor schuelisch gsee eher mittelmässig unterwäggs isch, in Chemie und in dr Sprooch jedoch efters brilliere kha. Me het ihm denn bi dr Bruefswaahl d Chemie noocheglait, und är het denn biinere grosse Basler Pharmaindustryy deerfe d‘ Lehr absolviere. Noch x-Joore in dr Chemie und duur e gressere Zwischefall (s‘ sinn die falsche Mitteli zämmegschmischlet woorde) het äär unfreywillig s‘ halbi Laboor in d Luft gjaggt. Si hänn en denn druffaabe frischtloos uff e Summer 2015 gschiggt kha. In dääre Zyt het äär si aige Laboor ereffnet. Wäg siiner fräche Schnuure, siine Jugenderinnerige und siine Fähigkaite mit em Raime und dr Sprooch (wonär notabene bim Pfaarer gleehrnt het) isch gschnäll klar gsie, was fir e Laboor är in’s Lääbe ruefe wird: s‘ isch e Väärs-Laboor!


Und do foht au d Gschicht aa vom Schnitzelbangg Giftspritzi, wo im Herbscht druff bi dr Basler Schnitzelbangg Gsellschaft (kurz: BSG) um Asyl bättlet het und frindliggerwyys uffgnoo worden isch. Duur daas, ass äär bi de Nonne numme Psalmebumbbi (Kirchenoorgele) gspiielt het, het är sich entschlosse ohni Instrumänt uff d’Pischte z’goo. Siini Prèmiere isch an dr Fasnacht 2016 gsie. Mit vyyl Witz und giftige Ussage het äär si gmaischteret – wohrschyynligg esoo guet, ass äär in siim zwaite aggdiive Joor scho s’erschti Erfolgserlääbnis het kenne verbueche: nämmlig d’Ehr z'ha, an dr Vorfasnachtsveraaschtaltig „Ridicule“ im Badische Bahnhoof uffdrätte z‘deerfe.

Yybrigens: Dr Namme Giftspritzi sett uff kai Fall negativ gwäärtet wärde. S Motto isch allewyyl: "Es wird Gift in d Väärs pumpt, ass d Pointe richtig spritzig sind!".

In däm Sinn... à bientôt !