Dr neischti Väärs Dr eltischti Väärs

 

vom 19. Novämber 2017
Dr Fahneklau gääge Sion

Wäg däm Fahneklau bim Spiil FCB-Sitte,
Duen y d FCB-Fans inständig bitte:
Kennt me em Odermatt nit au siini Fahne mugge?
Denn wuurdi dä ändligg wieder emoll alkohoolfreys schlugge!

 

vom 14. Novämber 2017
Itaalie isch nit an dr WM 2018

E Tipp, wenn hyt Zoobe bim Pizzaiolo
E Pizza bschtellsch, wo zu Dir soll hai khoo
Mach jo kai Witz, das isch mi Bitt
Zem Bischbyyl, ob‘s als Dessert Schweedetorte git
Denn soone Spruch duet sich aktuell nit loohne
... und usserdäm waiss dä, wo di Huus duet woohne!

 

vom 27. Septämber 2017
Wicky und die stargge Männer

Am Donnschtig wird‘s staue: händ Geduld!
Do draa sinn d’Gaschtarbeiter schuld!
Uff dr Baustell schafft nur e Schwyzer - villicht au zwai,
...will d‘Portugiese blyybe nach em 0:5 sicher alli dehai! 

 

vom 22. Septämber 2017
E gfeerligen Uffdraag

Y ha mi Job als Journalist noch eme Daag kündet,
und em Chef das mit dr Angscht begründet:
Die Uffgoob haig mer fascht ain gää:
"Interview dr Constatin!" 

 

vom 25. Auguscht 2017
Dr nei Trainer vo GC

Zem Muri als neie Trainer vo GeCee,
Han y fir d Ziircher e gueti und e schlächti Noochricht zem iibergee:
Die Gueti: mit däm khasch wieder dr Leader jaage,
Die Schlächti: si miesse bald au no si glai Brueder erdraage ! 

 

vom 14. Auguscht 2017
D' Wält isch am spinne!

Y ha miiner glaine Dochter, will’s fascht nyt koschtet,
Zem Kindergaarte-Aafang e Ragete-Glacé boschtet.
Jetzt han y aber schiss und hoff, ass es sich nit bewäährt,
Dass dr Trump oder dr Kim iihre dr Krieg erkläärt! 

 

vom 04. Auguscht 2017
Frieh iebt sich!

S‘ wird in Biel - und das isch woor!
E Maiteli schwanger – mit numme 12 Joor!
Dr Zyyger haig schyyns au dr Gaischt vomene Teenie,
Scho stoht im BLICK: dr Hakan Yakin bykunnt e Bambini!

 

vom 08. Juli 2017
Gipfeldräffe in Hamburg

In Hamburg an däm Gipfelidräffe wiete die dümmschte Chaote,
S' isch e Schand was deert abgoht, wäg suttigne Idiote!
Mi Grosi lüttet mer ah, s'wird im N24 driiber brichtet,
Und si haig jetzt au grad scho zwai vellig entstellti Opfer gsichtet.
Y zapp drii und sag "Grosi du kunnsch nit druss!
Das isch dr Trump und d Merkel - die sehn immer so uss!"

 

vom 05. Juli 2017
S' isch halt nid immer so aifach!

Ähm…öh…ähm …ehm….
Öh…ehm...ehm…..äähm….
Ehm…äh…ööhm…ehhm…ää
Ähm…ähhm…äh…ööö….eee..
Ööö…eee..ää…ooo - das isch kai Schrott
So erkläärt uns dr Boris Becker si Bankrott! 

 

vom 25. Juni 2017
Är kha's aifach nit loo syy...

Au e Joor spöter - jä guet, das kha bassiere
Duet dr Löw immer no siini Juweele massiere.
Jetzt het Emmi reagiert und loht d Katz uss em Sagg,
Bald gits d Fäänversion vom "Yogi-Drink" - mit fuulem Eiergschmagg! 

 

vom 26. Mai 2017
Dr FCB-Fischer.... e typische Ziircher!

Es griegt dr FCB-Fischer, näb em Maischter und em Cup - das kha numme däm bassiere:
Noone Mikrowälle als Pokal - zem dr glyych Saich uffzwäärme, wo'ner immer duet parliere!

 

vom 10. Mai 2017
Die neie Gäldnoote

Nach dääre neie 20er Noote, doo han y studiert,
Was wird ys äggscht als näggschts präsentiert?
Mi absolut schlimmscht Szenario,
Dr Blocher hänns uff dr 1000er gnoo.
Doo gäbt‘s fir mi halt nur no ai Nutze:
Y wuurd s erscht Moll mi Arsch mit Nöötli butze!

 

vom 28. April 2017
Dr FC Basel isch Schwyzermaischter

Lueg, wie d'Stadt duet rootblau glänze,
Dr FC Basel duet e zwaite Stäärn ergänze.
Speetischtens jetzt muess dr FC Sion begriffe:
Mer wänn im Cupfinal au nach Stäärne griffe.
Noone glaini Warniig an FCZ - Leader Nati B:
Neggscht Saison wäärdet au iihr gegen uns wieder Stäärndli gsee! 

 

vom 26. April 2017
Wo blybbt dr Summer?

Jetzt hänn doch die Ziircher grad no iihre Knallkopf in ere Rekordzyt verjagd,
Aber mit em Winter verdryybe, het’s bis jetzt noonig eso klappt.
Me miessti doch wisse, ass die Ziircher numme blagiere und liege,
Und uns bschysse, bis sich d Brätter dien biege.
Zem Bischbyyl suech y dr Summer scho vergääbe, syt Stunde,
Und au im Ziiri-Gschnätzlets hani no immer kain vo dääne Ziircher gfunde! 

 

vom 30. Januar 2017
Federer geege Nadal

Dr Nadal, das muess ych eich verzelle
Het's Melbourne aigentligg gwinne welle
Närvees längt er sich ans Oohr, däm Groosse
Zupft sich die ganz Zyt so saubleed an siine Hoose
Die Hoose het denn, s isch nit glooge
Unser Rodscher iihm definitiv aabezooge! 

 

vom 13. Januar 2017
Dr Wild-Maa 2017

Doo ligg y also im Spittel - Zimmer 320ig
D Bagge uffgrisse, d Zeen uuseghaue, mim Ranze goohts au ranzig.
D Ärm, dr ainti isch schweer verschtuucht, dr rächti isch im Gips,
und wenn y no so noohdängg hany s Gfyyl, y haig nimm so vyyl Grips.
D Fiess die sehn luschtig uss, wenn y si genau betracht,
dr ainti luegt linggs, dr anderi rächts, lägg wie hani glacht!
Und alles numme wäg däm Ganze,
Will y am Voogel Gryff umsverregge ha welle - als Wild Maa danze ! 

 

vom 06. Novämber 2016
Ami-Waahle

Trump oder Clinton, die Amis dien spinne!
Näggscht Wuche, doo kha halt nummen ain gwinne.
Fir mi stooht aber syt langem scho fescht:
Es isch nur e Waahl zwische Cholera und Pescht !

 

vom 26. Oggtoober 2016
Horror-Gleen
Im Schwoobeland händs de Bürger gsait,
Will me die Horror-Glöön deert nimm verdrait.
Duet di sone Gloon beläschtige und steere,
Denn darfsch di mit alle Mittel weere.
Wurd d Schwyz das Gsetz denn au begriesse,
Miesste mir Basler daas mit Vorsicht gniesse!
Drum pass uff, wämm ains uff d Schnuure gisch,
s kha sii, ass dä numme bi dr Negro Rhygass isch