Fasnacht 2017

Bi Samsung-Gräät kha’s guet bassiere
Ass‘ die Siechen explodiere
Drum khasch si jetzt ganz exklusiv
Zrugg gää - will s’isch explosiv
Drotz allem han ych sinnvoll dänggt
Und ains dr Schwiigermueter gschänggt!

Schalt ych dr Färnsee yy, lauft dr vo Wattewyyl
Schalt ych s Radio aa, schnuurt dr vo Wattewyyl
Gang ych ins Häbse, denn spiilt dr vo Wattewyyl
Dä wird mir langsam zvyyl - dä vo Wattewyyl
Jetzt han ych jedes Moll Schiss, jä y glaub, y spinn
Wenn y dr Yyskaschten uffmach...
...es hoggi dr Wattewyyl dinn!

Letscht Summer, an däären EM z Paris
Gits gwissi Sequänze vom Löw - und die sinn myys!
Zerscht längt er sich an s’Ai, an s’Lingge
Und fiehrt die Hand denn poschtwändend an Zingge
Bim Abklatschen am Schluss, han ych uff ai Moll - persee
Dä Schieler verstande, wo si Hand nit will geeh!

Die neie Stiehl uff de Stroosse find ych glatt
Sithäär gang ych gäärn in d Innerstadt
Mi Zwätschge brobiert vyyli Glaider und Schueh
Ych hogg voruss - mitme Bier - und gniess mi Rueh
S'Ainizig wo steert - ych muess voller Quaale
Uffstoo und iire das Zyyg go zaahle!

D’ Super League, die isch doch quatsch
Wirgglig Toodlangwiilig - jeede Match
Anstatt 90 Minutte z fääne
Duet me 90 Minutte gääne
Uff dr andere Sytte, dängg ych mir immer:
E halb Stund Telebasel – das wär vyyl schlimmer!

Dr Mike Shiva; y glaub, vyyl sinn do gaar nit muff
Heert mit sim Hokuspokus uff
Jetzt het dä Bonsai-Indiaaner e neiji Idee
Und mecht bim SRF, dä Samschtigs-Jass iibernee
Mit Kaarte haig är jo Erfaarig, maint dr Shiva stuur
Und frai sich uff e Schieber - mit em Schuuflebuur!

Bi däm Pokemon-Spiil settsch jo Monschter sueche
Aber y find irgendwie kaini und bi nur am flueche
Ych bi denn in dr ganze Stadt ummegrennt
Numme mi Handy het aifach kai Monschter erkennt
Stunde speeter han y vo däänen aber Dausigi droffe
Jä... ych Duubel bi bis uff Ziiri gloffe!

Y ha dr no welle gratuliere, liebi Martina
Fir die silbrigi Medallie an dr Olympia
Jetzt khasch di ändligg wieder mit de Grosse mässe
Das mit em Kokain - hänn mir längschtens vergässe
Aber ebbis stelli fescht und druff bestohn’y
Richtig schnuure khasch halt immer noni!

Ebb dr Trump duet polarisiere
Duet mi iiberhaupt nit interessiere
Vo siiner Politigg han ych kai Aahnig
Au vo sim Uffdritt nit und vo siiner Plaanig
S isch mer egal, ebb äär e bitz anderscht dänggt
Aber si Gwaffeer - dä gheert sofort ghänggt!

Stohsch Du uff ganz haissi Sache?
Und duesch au gärn dräggigs mache?
Spitze Di Sauereyen aa?
Dryybschs gäärn vor dr Kamera?
Uff was wartisch, fyyl di frei
Bewirb Di bi dr Basler Bolizey!

Mi Doggter haisst jetzt Morin Guy
Das mit em regieren isch verbyy
Drum duet äär wieder Kliänte stille
Mit Drepfli, Wässerli - aber joo kai Pille
Also: verlehrnt het dää jo si Aarbet nit
… will’s im Roothuus rächt vyyl Granggi git!

Mi Groossbabbe hänn’s letschti in dr PUK iigschlosse
Dä het so richtig dr Voogel abgschosse!
Daagelang isch dä in dr Wältgschicht ummegirrt
Und gfunde worden isch är z Davoos - vellig verwirrt
Derbyy het dä Armi numme dä Wääg absolviert
Will är e Poschtstell suecht - wo no exischtiert!

Letschti kumm ych friehner hei
do liggt mi Frau - im Bett … ellai
D Hoor verstrubblet, im Evaglaid,
“Bisch scho doo?” het si zue mer gsait
Wo isch är, han ych welle wisse,
Und ha dr Glaiderschrangg uffgrisse
Dert griesst mi dr Pöschtler, jetzt muesch loose,
Splitternaggt - also oohni Hoose
Lägg, bin ych froh, das wäär e Quaal
Y ha gmaint, dä Wattewyyl syg iiberaall!

Doo goohts zrugg zu de andere Väärs